طيب وانت كمان...
ليه زعلت منك؟ وخاصمتك؟ وخدت على خاطري منك السنين دي كلها؟!!!
اكمني يعني ما كنتش فاهمة يعني ايه فرح ومصاريف قاعة وحجز كراسي المعازيم بالعدد؟ وقلت لك اعمل حسابك أنا واخواتي وولاد الجيران لازم كلنا نكون معزومين؟ فقررت ما تعزمنيش عشان ما تجيبش لنفسك وجع الدماغ؟!!
طيب كنت فهمني... كنت حقدر والله... ما انت عارف انك لو كنت فهمتني الكلام دة واحدة واحدة... صحيح وقتها كان ممكن ألوي بوزي يومين ... تلاتة... شهر بالكتير... لكن أكيد ما كنتش عاملتك بقلة ذوق أول مرة شفتك فيها بعد السنين دي كلها...
كنت تعالى على نفسك شوية وفهمني... ما انت عارف اني ما ليش في حاجات الكبار دي... ولا ناسي اني كنت بجري ورا السمك في المية لما شدتني من ذراعي قبل ما أخبط في المركب ويمكن كنت مت ساعتها... ولا لحقت أزعل منك ولا لحقت أتأسف لك بعد السنين دي كلها... ازاي كمان نسيت انك أنقذتني من الموت في يوم من الأيام؟!!!
ازاي أخاصمك كل الوقت دة وانت الشهم الواضح الصريح اللي قلتها لي بكل صراحة ووضوح... ولا يهمك أنا حتجوزك دلوقت حالا... عشان مرة سمعتني بشتكي من ظلم أقرب الناس لي بعد موت بابا ؟!!
بس أقول لك على سر؟ لعلمك بقى... أنا كنت عارفة انك مش بتهزر وانك بتحبني بجد... بس أنا اللي استعبطت وعملت نفسي ما خدتش بالي وغيرت الموضوع عشان أقرب صديقة لي كانت معجبة بيك... ما كانش ينفع اجرح مشاعرها مهما كان...
وبمرور الوقت عرفت ان كان معايا حق... عارف ليه؟ عشان لو انت كنت بتحبني بجد كنت أصريت على طلبك وزنيت علي وما كنتش في يوم من الأيام لا قلبك ولا عقلك طاوعوك انك تتجوز حد تاني...
ولا أعترف بالحقيقية اللي أكبر من دي ودي؟
أنا خفت أصدقك... لاحسن تكون قلت كدة في لحظة حماسة وتروح لحالها... قلت أحسن لي أستعبط عشان أعفيك من أي التزام انت مش متاكد منه...
أنت كنت أطيب بكتير من اني أزعل منك او أخاصمك كل السنين دي... أنا آسفة... أنا مش زعلانة منك.... أصلا ما ليش حق أزعل منك أبدا.... لاني بجد مش بفتكر لك غير كل حاجة حلوة...
ليست هناك تعليقات:
إرسال تعليق